మనమంతా మానవతా వాదులం
తుపాకులను ఎక్కుపెట్టి కుత్తుకలను నొక్కిపెట్టి
ఆర్తనాదాల అశ్రువులలో ఓలలాడుతుంటాం...మానవతావాదులం...
ఎదుటివాడి రక్తంతో ఇల్లు అలికి ముగ్గు పెట్టి
వాడి పేగులను ఆభరణాలుగా మెడను పెట్టి
జాతి ఉద్ధరణకు నడుము కట్టిన ఉత్తములం
మనమంతా మానవతావాదులం...
పోలీసు, మిలిటరీ, అసామాజిక శక్తి., మరొకటి
ప్రతీవాడి అహంకారానికి రాలిపడిన తల ఒకటి
నరకటంలో మనలో మనం ఒకరికొకరు పోటి
ప్రజా మాన ప్రాణ రక్షణ చేరుకుంది గోదారి
మనమంతా మానవతావాదులం...
దిక్కులేని వారికి దేవుడే దిక్కని
ఠక్కున నమ్మి వాడి కుత్తుక కోసి
ఆ భగవంతుడి ఒడికి చేరుస్తుంటాం
ప్రభూ...మానవతావాదులం
మేమంతా మానవతా వాదులం...
అమ్మ ఆలి లెక్కే లేదు
అక్కా చెల్లి తేడా లేదు
మానానికి విలువే లేదు
తుపాకుల రాజ్యాధిపతులం
మానవతావాదులం
మేమంతా మానవతా వాదులం...
శాంతి శాంతి అంటాం
పావురాలని వండుకు తింటాం
గాంధీ తాతని పూజిస్తాం
మరో గాంధీని కాల్చేస్తాం...
మంచితనపు ముసుగు వెనుక
దాగి వున్నా రక్కసి మూక
దేశమాత భవితను రక్షిస్తుందా ఇక
అమ్మా...భారతమాత
నీ శాంతి చరిత ముగిసిందిక...
ప్రభూ..రక్షించు మమ్మల్ని
మేమంతా మానవతా వాదులం !!
కామెంట్లు లేవు:
కామెంట్ను పోస్ట్ చేయండి